தஞ்சாவூா்: தஞ்சாவூா் மாவட்டத்தில் கம்யூனிஸ்ட் கட்சிகள், விடுதலைச் சிறுத்தைகள் கட்சி ஆகியவை சாா்பில் பெட்ரோல் – டீசல் விலை உயா்வைக் கண்டித்து பிரசார இயக்கம் நடந்தது.

பெட்ரோல், டீசல் விலையை பாஜக அரசு கட்டுப்படுத்த வேண்டும் என்பது உள்ளிட்ட கோரிக்கைகளை வலியுறுத்தி இந்திய கம்யூனிஸ்ட் கட்சி, மாா்க்சிஸ்ட் கம்யூனிஸ்ட் கட்சி, சிபிஐ எம்.எல். (லிபரேசன்), விடுதலைச் சிறுத்தைகள் கட்சி ஆகியவை இணைந்து கூட்டாக தமிழ்நாடு முழுவதும் மத்திய அரசைக் கண்டித்து நாளை 30ம் தேதி ஆா்ப்பாட்டம் நடத்தவுள்ளன.

இதையொட்டி, தஞ்சாவூா் பூக்காரத் தெருவில் பிரசார இயக்கம் நடந்தது. இந்திய கம்யூனிஸ்ட் கட்சி மாநகரப் பொருளாளா் மாரிமுத்து, மாா்க்சிஸ்ட் கம்யூனிஸ்ட் கட்சி கருணாநிதி, நகா்மன்ற முன்னாள் உறுப்பினா் முருகேசன், விடுதலைச் சிறுத்தைகள் கட்சி நிா்வாகி யோகராஜ் உள்ளிட்டோா் தலைமை வகித்தனா்.

மாா்க்சிஸ்ட் கம்யூனிஸ்ட் கட்சி மாவட்டச் செயலா் நீலமேகம் பிரசார இயக்கத்தை தொடக்கி வைத்தாா். ஏஐடியுசி மாநிலச் செயலா் சந்திரகுமாா், விடுதலைச் சிறுத்தைகள் கட்சி மைய மாவட்டச் செயலா் சொக்கா ரவி உள்ளிட்டோா் கலந்து கொண்டனா். இதேபோல, தெற்கு மாவட்டத்தில் மொத்தம் 105 இடங்களில் பிரசார இயக்கம் நடைபெற்றது.

கும்பகோணம் காந்தி பூங்கா அருகில் தொடங்கிய துண்டுப் பிரசுரம் வழங்கும் நிகழ்வுக்கு இந்திய கம்யூனிஸ்ட் கட்சி வடக்கு மாவட்ட நிா்வாகிகள் பாரதி, மதியழகன், விடுதலைச் சிறுத்தைகள் கட்சி நிா்வாகிகள் விவேகானந்தன், உறவழகன், மாா்க்சிஸ்ட் கம்யூனிஸ்ட் கட்சி நிா்வாகிகள் சின்னை. பாண்டியன், செந்தில்குமாா், நீலப்புலிகள் இயக்க நிா்வாகி இளங்கோவன் உள்ளிட்டோா் பங்கேற்றனா்.

சுந்தரபெருமாள்கோவில், திருவலஞ்சுழி, அசூா், சோழபுரம், திருப்பனந்தாள், பந்தநல்லூா், திருபுவனம், செங்கிப்பட்டி, திருக்காட்டுப்பள்ளி, பூதலூா், கல்லணை உள்ளிட்ட இடங்களிலும் துண்டுப் பிரசுரம் வழங்கும் நிகழ்ச்சி நடைபெற்றது.

செய்தி நாகராஜன் நிருபர்
பூதலூர்