தஞ்சாவூர் அக் 26: இல்லம் தேடி கல்வித் திட்டத்தில் பணியாற்ற 50,000 தன்னாா்வலா்கள் பதிவு செய்துள்ளனா் என்று தஞ்சாவூரில் பள்ளிக் கல்வித் துறை அமைச்சா் அன்பில் மகேஷ் பொய்யாமொழி தெரிவித்துள்ளார்.

கடந்த இரு ஆண்டுகளாகக் குழந்தைகள் பள்ளிக்குச் செல்லாததால், கற்றல் இடைவெளி மிக அதிகமாக இருக்கிறது. குழந்தைகள் எப்படி பென்சிலை பிடித்து எழுதவோ, எழுத்துக் கூட்டிப் படிக்கவோ செய்யப் போகின்றனா் என்பது மிகப் பெரிய சவாலாக இருக்கிறது. இதை எதிா்கொள்ளும் விதமாக இல்லம் தேடி கல்வித் திட்டத்தை முதல்வா் வடிவமைத்துக் கொடுத்துள்ளாா்.

இத்திட்டத்துக்கு 1.70 லட்சத்துக்கும் அதிகமான தன்னாா்வலா்கள் தேவைப்படுகின்றனா். இதுவரை 50,000 போ் பதிவு செய்துள்ளனா். இன்னும் தன்னாா்வலா்கள் முன்வர வேண்டும். பிளஸ் 2, பட்டப்படிப்பு முடித்தவா்கள் இணையதளத்தில் பதிவு செய்து கொள்ளலாம். சமுதாயக் கூடம் போன்ற பொதுவான இடத்தில் 20 மாணவா்களுக்கு ஒரு தன்னாா்வலா் வீதம் மாலை நேரத்தில் வகுப்பு எடுப்பாா்.

நவம்பா் 1 ஆம் தேதி முதல் தொடங்கப்படும் இத்திட்டத்தை முறையாகத் தமிழக முதல்வா் 2 அல்லது 3 நாள்களில் தொடங்கி வைப்பாா். ஒன்றாம் வகுப்பு முதல் எட்டாம் வகுப்பு வரை நவம்பா் 1 ஆம் தேதி முதல் பள்ளிகள் திறக்கப்படும் என ஏற்கெனவே தமிழக முதல்வா் அறிவித்துள்ளாா். இதன்மூலம், குழந்தைகளுக்குக் காலையில் இத்தனை மணிக்கு எழுந்திருப்பது, சீருடை அணிவது, பள்ளிக்குச் செல்வது போன்ற நன்னடத்தைகள் ஏற்பட வேண்டும் என்பதற்காகத்தான் பள்ளிகள் திறக்கப்படுகின்றன.

தற்போது கொரோனா காலமாக இருப்பதால், பள்ளிக்குக் கண்டிப்பாக வர வேண்டும் என்றும், வந்தால்தான் வருகைப் பதிவேட்டில் பதிவு செய்யப்படும் எனவும் சொல்ல முடியாது. நவம்பா் 1 ஆம் தேதி பள்ளிகளைத் திறந்து வைக்கிறோம். யாா், யாா் விருப்பப்படுகிறாா்களோ அவா்கள் குழந்தைகளை அனுப்பி வைக்கலாம். தீபாவளி கழித்து வேண்டுமானாலும் வரலாம். எனவே, நவம்பா் 1 ஆம் தேதி பள்ளிகளைத் திறப்பதில் எந்தவித மாற்றமும் இல்லை என்றாா் அமைச்சா்.

நாகராஜன் நிருபர்.
https://thanjai.today/